Xaqani Has Өvvөlki   Sonraki Jurnal 2006N2 Xaqani Has Borc Üzü qoylu uzanıb zaman Dörd fəsil portağala yığışıb Dənizlərin dəniz olan vaxtında Gülüşlərin çoxu uşaq, Gülüşlərdən biri qorxan uşaqdır... Sənə borc verirəm baxışlarımı Ayaqlarınla qorxmağı tərgidib Gözlərinlə qorxmağı öyrənəndə Qaytararsan onları Caz Fotoşəkil gözəldir, əynində ağ ütülü köynəyi yetmişlərdən qalma uzun yaxalığıyla; qəhvəyi şalvarı — təmiz, şax yetmişlərdən qalma enli balaqlarıyla; dodaqlarında təbəssüm — ehtimal ki — yetmişlərdən qalma bir məhəbbət macərasından. dayımdır, iyirmi birinci əsrin ilk ölüsüdür Qatil Ayrılıqdır dünyanın ən gözəl qadınıydın dünənə qədər, bu günsə diş ətlərin görünür sən güləndə yeriyəndə çiyinlərin əyilir əllərin kobud, ayaqların yekədir. qatili ayrılıqdır gözəlliyinin! Mənzərə Janrında Ağlamaq çəmən-çəmən yaşıllığın yağış-yağış sərinliyin qucaq-qucaq günəşin arxasında kimsə ağlar sarı-sarı yaşılın bərisində gül açanlara Dəfnqabağı Dəfn illərlə yumruğunda saxladığı əllərini ciblərindən çıxartdılar, təpiyində gəzdirdiyi ayaqlarını çəkmələrindən. görmək istəmədiklərindən sildilər eynəyində bərəltdiyi gözlərini; özüylə birgə doğulub özü boyda böyüyən qəbrinə qoyulanda. Aparılan Hər ayrılıq nəsə aparır məndən Gedən geri qayıdır, qayıtmır aparılan Gözlərin kimi, Gözlərin getdilər və sonra qayıtdılar Geri qayıtmadı gözlərindəki Bayron və Biz cavan ölümlərin ən gözəli Bayronun ölümüdür hamımız gənc ölə bilərdik ölümsüzlük arzusu qocaltdı bizi Yuxu yatmısan, yuxu görürsən yuxunda göy üzü var əllərin göy üzünə gəzməyə gedib səni oyandırmağa qıymıram oyansan əllərin yox olar mənimsə misram qalmadı içinə sığmağa üstəlik göy üzünün yuxusuyam oyansa yox olaram Dünyanın Reenkarnasiyası itlər evdə insan kimi yaşayırsa insan kimi ölürsə; insan da küçələrdə it kimi yaşayırsa və it kimi ölürsə bu dünya özündən əvvəlki dünyanın cəhənnəmidir. Mətbəx Pomidorda üzü qızaran qadın Kartof qabığında soyundu Tavadaki yağda əriyib Lay-lay döndü qaşıqda Əllərindən başladım yeməyə Pomidorlu kartof qızartmasını Yalqızlığın Ölçü Vahidi bir azyaşlı oktyabr boylanır sol ayağımdan, keçmişlərdən bir ovuc çəmən — sol ayağımda; yaşıl ayaq izidir döşəmədə yalqızlıq. bir addımlıq boşluğa əsir düşüb sağ ayağım, (qapı kilidinə zorla açar salınar kimi) addım salır gələcəyə sağ ayağım. boğuq səs tonuyla, kül rəngində boşluqdur döşəmədə yalqızlıq. Mandolina Üçün Bəstələnmiş Qadın sözləri gecəyə musiqisi payıza məxsus bir qadın eşidilir qatarın kupesində mandolinada ifa olunur qadın heyif ki mandolina çalmağı bacarmıram. Aksent beynimin öz dilində o qədər danışmışam ki indi bütün dillərdə aksentli danışıram ]